今晚我一個人在家, 所以我整晚都在細房裡陪伴 Kimchi. 我已經將佢可以匿埋的地方封了, 所以佢要迫住同我面對面

貓仔始終都係要睡覺, 雖然佢最初唔係瞓係响我隔離, 但我一郁有任何聲音, 佢就立刻醒返望我搞乜. 我有摸佢, 佢就係咁縮. 我有時又餵下野食俾佢, 我又會坐係地上扮瞌埋眼, 等佢安心 d. 但隱約都會見到佢對眼留返一條線, 睇下我搞乜咁.

後來我拿了部手提電腦入來, 最初都係坐地下, 佢聽到我打字的達達聲, 就八八卦卦走埋黎左聞右聞, 跟住又走開返書枱上監視我, 後來我索性坐埋書枱到用電腦, 佢又無走開喎. 我見佢睇住我對手打字, 所以我就伸隻手出來, 收埋 d 手指, 摸下佢, 跟住佢又將佢隻手手搭過來, 又聞下我隻手, 講真我 d 驚佢伸爪刮我, 因為佢放隻手手响我手背時係擘大手指隙, 唯有忍住唔郁. 過左無幾耐, 佢又用手撥下我隻手, 我又摸佢頭頭, 如是者, 試過幾次, 佢又反晒身咁, 好似示意叫我摸佢頭頭咁, 好得意.

而家我繼續坐緊o係張枱度, 而佢就瞓左係我部電腦隔離, 我 dd達達打字, 佢都無走開, 半瞌雙眼, 攤左响到.

p.s. 佢都係唔肯俾我抱, 會掙扎走.

我地去完街返屋企睇下經過一天在房裡靜思己過的 Kimchi, 似乎已經平靜下來. 雖然都係會縮, 但都肯俾我地摸. 我地出街時去書局睇下貓貓書, 佢話要經常撫摸貓貓, 多 d 身體接觸, 等佢熟習被撫摸的感覺, 但要見好就收, 如果發覺佢開始唔鍾意時就要停手.

我地一邊摸, 佢一邊”咕”, 於是我地就順勢剪埋佢地指甲, 免得搞到我地又再傷痕累累. 但剪到最後一隻腳仔時, 佢就不斷縮, 開始唔鍾意, 所以我地都唯有收手先, 遲 d 先至再剪.

雖然佢又俾返我地摸, 但一不留神, 佢又匿返埋去書枱 “la” 到, 我地唔想驚動佢, 所以就只係摸唔勉強抱佢出來. 一來我都幾驚會又俾佢咬同抓

前兩天諗住俾 Kimchi 對我地無咁驚, 所以唔勉強抱佢, 只係開房門俾佢自由行, 同埋同佢玩毛毛玩到顛晒, 伸晒脷咁. 佢亦都無咁容易因為我們的走動而揾地方匿.

所以今天我嘗試抱佢, 但點知佢發晒顛咁掙扎, 抓到我兩隻手都係痕. 之後見佢平靜返, Ken 又嘗試抱佢而且好似以前咁立即坐低, 但佢又發顛咁亂抓亂郁. 抓到 Ken 件 T shirt 都有窿. Ken 鬧佢打佢, 佢竟然 chee Ken 喎, 又想咬, 好曳呀! 唯有 lock 佢入返房, 希望佢會乖返 d la, 莫非俾自由佢, 同佢玩得顛得滯會令佢野性重現.

每天搵地方躲埋就係 Kimchi 見到我地的事情, 梳化底就係佢的最愛, 可以話非常安全, 如果佢唔肯出來, 我地要大費周章咁移開成張梳化先至可以捉返佢出來.

戰鬥格, 趁機出擊

戰鬥格, 趁機出擊

梳化底下監視你

梳化底下監視你

我地決定明天返到屋企只會打開佢的房門, 唔去抱佢住, 等佢對我地唔會咁有敵意, 希望會有改善啦!

昨晚發生了2 件第一次:

1. 放工返到屋企, Kimchi 竟然已經將食物清倉! 哇, 把握時機, 試下將 d 糧放係手到, 睇下佢肯唔肯從我手中食. Yeah! 肯喎! 於是再餵佢食營養膏, 呢支野個外形係成支牙膏咁, 本來Ken 係成支隊俾佢食, 但佢又驚喎, 係咁避, 所以就試下”脂” 落隻手到, 睇下佢會唔脷. 好野, 佢有又肯呀, 佢條脷 d 倒鈎搞到我隻手好痕 ..haha

2. 呢件就唔係咁好的事… 話說我地o係廳, 佢就當然躲係梳化底啦. 幾經辛苦攞條毛引到佢出來, 想捉佢時佢又想走返去梳化底喎, 於是我心急就”禁”住佢個身, 佢竟然回頭好大聲咁 “che” 我呀, 好惡呀! 我好驚就唯有立刻放手, 跟住成晚佢都驚左我, 希望佢好快 d 忘記呢件事啦~~

每天早上起床, 或放工返屋企時, 都不期然會諗下開門後 Kimchi 會躲在o那兒

今早起身未刷牙洗面就急不及待開門睇下佢. eeee.. 籠裡見唔到, 廁所又唔到, 放眼所見都揾唔到 Kimchi 的蹤影!

行近張窗台書枱, 終於見到佢原來躲在書枱同窗之間條 “la” 位到! 頭向下, 叫極佢都唔應我, 好似你見我唔到, 你見我唔到咁~~