做手術時, 話晒 Kimchi 都係女 (雖然行為樣貌都唔似), 所以俾人剃晒下半身 d 毛, 光脫脫咁. 不過佢好快就生返, 而家佢 ge 花肚肚終於重出江湖, 不過當然離長毛毛好遠~~
光脫脫的下身
斑點再現! d 毛出返啦!
咩呀! 未見過靚女呀!
今朝早 Kimchi 已經會回復本性, 知道我地起左身出左黎, 就喵喵叫, 當然把聲唔及以前咁响, 仍然係好弱.
檢查下佢有無食同痾, 係有食到幾粒糧, 但就無痾, 而對眼仍然係迷迷糊糊咁, 掙唔大, 但又死要出來. 見佢動作緩慢, 但都有跳上飯枱, 但跳返落黎時, Ken 就話見佢定左格, 唔知係唔係: “幣, 好鬼痛”
緊張的時刻來臨.. 就係我地要餵佢食藥… 真係超高難度, 學姑娘咁掙開佢個口.. 但係佢就用前爪抓我地, 放左粒藥响佢個口, 但佢就又吐返出來. 最終 Ken 掙開佢個口, 我扔粒藥落佢個口先成功.
為左令佢開心 d, 我地就餵佢食 yogurt, 好彩佢都好有興奮咁食晒., 都無咁驚.
到晚上我地返屋企, Kimchi 已經大致回復返精神, 眼仔圓圓咁, 無迷迷糊糊的眼神. 俾佢d 乾糧都食晒, 於是我地開左罐濕糧餵佢, 佢都食得好滋味, 放心晒
睇下佢個樣幾精靈
睇下佢個樣幾精靈
昨天終於帶了 Kimchi 去做手術!
去到診所大約 10 點半到, 磅下, 哇, 仲瘦過上次, 只係得 3.07kg 到, 徐醫生都話佢 underweight 左了了, 希望佢做手術後會肥返 d. 個姑娘三扒兩撥, 就將 Kimchi 放左入去個洗衫袋入面, 咁我地就走得.
到12點時, 收到電話, 係診所打黎, 真係心都跳埋出黎, 幾驚有 d 咩事呀. 好彩姑娘只係通知我做完手術, Kimchi 已經醒返, 可以在 3 點過後接返佢. 我覺得間診所幾好, 佢唔會話: “你隻貓已經醒返” , 而真係用名o黎 name 佢: “Kimchi 已經醒返” , 語氣亦都唔冷冰冰, 感覺 warm d, 有時就係呢少少野而會令個客感覺好 d.
放左工拿拿臨去接佢, 佢响個籠到, 用背脊 “tuk” 住, 叫佢時, 佢就擰轉頭, 迷迷糊糊, 用盡佢 d 力氣但仍然氣若如絲, 以投訴的語氣 meow meow 叫.手術費盛惠 850 大洋, 然後姑娘教我地點張開佢個口, 將手指經過佢尖銳的牙, 塞粒藥落去佢個喉嚨, 我地真係有好大滴汗… 我地真係做得到嗎?! 唉~~ 仲要每天早晚各一次, 食成個星期.. really big wok!
返到屋企, 因為 Ken 驚佢要去廁所, 打開個籠門口, 佢竟然行出來, 仲要跳返上張枱到, 我真係戥佢痛, 睇清楚佢, 下半生肚位完全光脫脫, 佢企响到時, 見到佢脾位對上係凹左, 唔通係割左好多野走?! 加上佢對眼半開合, 咪晒咁, 鬼死咁眼瞓, 真係我見尤憐. 仲要行出廳, 我地就梗係推返佢入房
我就清洗好佢個廁所, 唔用貓砂, 因為驚 d 貓砂會有細菌, 令到佢傷口感染, 所以鋪了 kitchen paper. 然後就 close the door, 俾佢休息, 咁耐以來, 係第一次我地食飯時, 佢唔嚷著要出房.
到了晚上 10時, 我入房準備餵水同食物, 佢本來係個菠蘿入面, 見到我又八卦咁走出來, 仍然係眼細細, 勁眼瞓咁 ge 樣, 但都唔飲水同食野, 係要我地將d 水滴落枱面, 佢先至脷. 於是我地就咁放 d 糧水响枱同地下, 等佢無論响邊都可以食.
